शिवसेना सोडायची त्यांनी खुशाल जावे : शिवसेनाप्रमुख

मुंबई, ता.5 : ""आम्ही अस्वलासारखे आहोत. अस्वलाच्या अंगावरचा एक केस गळाला म्हणून काय फरक पडतो? शिवसेनेतून ज्यांना जायचे त्यांनी खुशाल निघून जावे; परंतु महापालिकेवरचा भगवा कोणत्याही स्थितीत खाली खेचू देणार नाही'', असा ठाम विश्‍वास शिवसेनाप्रमुख बाळासाहेब ठाकरे यांनी आज येथे व्यक्त केला.
शिवसेनेच्या नवनिर्वाचित आमदारांना "शिवसेना भवना'त तब्बल 35 मिनिटे मार्गदर्शन करून बाळासाहेबांनी या आमदारांचा आत्मविश्‍वास वाढविला. त्यांना संबोधित करताना शिवसेनाप्रमुख म्हणाले, ""विधानसभा निवडणुकीतील अनेक जय-पराजय आम्ही पचवले आहेत. त्यातून तावून-सुलाखून निघालो आहोत. तुम्ही जरी 44 आमदार असलात तरी मी तुमच्याकडून 88 आमदारांचे काम करून घेईन. समुद्राला चंद्रबळानुसार भरती-ओहोटी येत असते. चंद्रबळ म्हणजे जनताजनार्दन आहे. विधानसभा निवडणुकीत शिवसेनेला ओहोटी आली आहे; पण याच चंद्रबळावर एक दिवस शिवसेनेला भरती येईल, असा विश्‍वास मला आहे.''

"मराठी माणसाविषयीच्या वक्‍तव्याचा विपर्यास'
"शिवसेना भवन'कडे येताना दुकानांच्या अनेक पाट्या मराठीत दिसल्या. येथे असणाऱ्या इंग्रजी पाट्यांना त्यावेळी मी स्वत: काळे फासले होते, अशी जुनी आठवण सांगून ""नारायण राणे यांना त्यांच्या कारभारामुळेच मी बाहेर काढले. आता सरमळकरही त्याच वाटेने गेले आहेत'', असे ठाकरे म्हणाले. मराठी माणसाने शिवसेनेच्या पाठीत खंजीर खुपसला, असे मी कधीही म्हणालो नव्हतो, असे त्यांनी स्पष्ट केले. शेजारीच बसलेल्या खासदार आणि "सामना'चे कार्यकारी संपादक संजय राऊत यांच्याकडे वळत, ""मी असे कधी म्हणालो होतो का?'' अशी पृच्छा त्यांनी केली. त्यावर राऊत यांनी, ""तुम्ही असे कधी म्हटले नव्हते. मराठी माणसाने पाठ फिरवली एवढेच तुम्ही म्हणालात. मीडियाने त्याचा विपर्यास केला'' असे राऊत म्हणाले. बाळासाहेबांनी प्रसिद्धिमाध्यमांना यावेळीही लक्ष्य केले. सध्या प्रसिद्धिमाध्यमांनी आपल्या विरोधात भूमिका घेतल्याचा आरोप त्यांनी केला.

चौकट...
टोले आणि चिमटे
विधानसभा निवडणुकीच्या प्रचारासाठी बाहेर पडलेल्या सेनेच्या अनेक ज्येष्ठ नेत्यांचा नामोल्लेख बाळासाहेबांनी यावेळी केला. मात्र त्यात गजानन कीर्तिकर यांचा उल्लेख करण्याचे राहून गेल्याचे लक्षात येताच बाळासाहेबांनी कीर्तिकर यांनीही थोडा-थोडा प्रचार केला, त्यांचे नाव घ्यायचे राहून गेले. नाव घेतले नाही तर ते सोडून जातील, असा टोला लगावला. शिवसेना नेते मनोहर जोशी यांनाही त्यांनी चिमटा काढला.